Óvissa með Drogba fyrir Liverpool-leikinn

Guus Hiddink, stjóri Chelsea, mun líklega ekki ákveða fyrr en á síðustu stundu hvort hann tefli Didier Drogba fram í leiknum gegn Liverpool í Meistaradeildinni á miðvikudag.

Drogba gat ekki spilað vegna meiðsla um helgina. Hann meiddist á tá í skotæfingu með Chelsea og þau meiðsli leiddu upp í ökklann.

„Drogba meiddist á æfingu og ökklinn brást ekki vel við. Við skulum sjá til hvort hann geti æft í dag og hvernig gengur í meðferð," sagði Hiddink.

Anelka var tekinn af velli um helgina svo hann yrði örugglega klár í slaginn. Jose Bosingwa ætti að verða klár sömuleiðis en hann meiddist lítillega með portúgalska landsliðinu.