Adebayor: Veit ekki hvernig ég skoraði

Emmanuel Adebayor tryggði sínum mönnum í Arsenal 1-1 jafntefli gegn Villarreal í fjórðungsúrslitum Meistaradeildar Evrópu í kvöld með glæsimarki.

Adebayor fékk sendingu frá Cesc Fabregas inn í teig, tók niður boltann með bringuni og skoraði svo glæsilegt mark með bakfallsspyrnu.

Hann hafði þó ekki hugmynd um hvernig hann skoraði þetta mark. „Það mikilvæga er að boltinn hafnaði í netinu," sagði hann eftir leik. „Ég er virkilega ánægður með mína frammistöðu. Mér fannst mikilvægt að fá að spila í kvöld og gott að ég hafði eitthvað fram að færa. Mér fannst við standa okkur nokkuð vel hér í kvöld."

„Þetta var erfiður leikur þar sem að við vorum að spila gegn liði sem spilar góða knattspyrnu. En við nutum leiksins. Nú eigum við síðari leikinn á heimavelli og verður það vissulega erfitt. Við ætlum þó að gera allt sem í okkar valdi stendur til að komast áfram."