Sá flugslysið út um stofugluggann

Vince Carter, leikmaður New Jersey Nets í NBA deildinni, trúði ekki eigin augum þegar hann leit út um gluggann hjá sér í gærkvöldi og varð vitni að því þegar Airbus þota US Airways nauðlenti á Hudson-fljótinu í New York.

"Ég sat bara og var að horfa út um gluggann og sá þá hvar þotan lenti á fljótinu. Mér fannst ég vera að horfa á sjónvarpið. Það var eins og í kvikmynd þegar vélin lenti á nefinu og maður heyrði drunurnar. Ég trúði ekki eigin augum," sagði Carter í samtali við Star Ledger.

Hann hringdi beint í einn af þjálfurum New Jersey, Jim Walsh.

"Þú átt ekki eftir að trúa hverju ég varð vitni að rétt í þessu," sagði Carter í símann.

Walsh var hinsvegar með stillt á sjónvarpið og því fór atburðarásin ekki framhjá honum.

"Ég held ég viti hvað þú átt við," sagði þjálfarinn.