Ferguson ánægður með Owen

Alex Ferguson, stjóri Manchester United, var ánægður með frammistöðu Michael Owen sem skoraði þrennu í 3-1 sigri liðsins á Wolfsburg í Meistaradeild Evrópu í kvöld.

Þetta var hans fyrsta þrenna fyrir Manchester United en þetta var góður sigur fyrir liðið, ekki síst þar sem margir leikmenn voru fjarverandi vegna meiðsla.

„Hann var frábær. Staðsetning hans í teignum og tímasetningar á hlaupum voru framúrskarandi og ég er virkilega ánægður fyrir hans hönd," sagði Ferguson í sjónvarpsviðtali eftir leikinn.

Hann var einnig ánægður með aðra leikmenn sem margir hverjir voru í nýju hlutverki á vellinum. „Þetta eru leikmenn sem eru afar hæfileikaríkir. Maður verður bara að treysta þeim. Þeir eru að sinna sínu og sýndu það í kvöld. Þeir lögðu sig mikið fram og það er það sem skiptir máli."