Einar íhugaði að senda mál Kára fyrir aganefnd

Það hefur mikið gengið á það sem af er í rimmu Vals og Hauka um Íslandsmeistaratitilinn. Einar Örn Jónsson fékk rautt spjald, Kári Kristjánsson rifbeinsbraut Sigurð Eggertsson, þjálfari Hauka heimsótti dómarana og nú síðast sendi Sigfús Sigurðsson frá sér yfirlýsingu þar sem hann harmar ummæli sín á Vísi í gærkvöldi.

Einar Þorvarðarson, framkvæmdastjóri HSÍ, segir að ekki verði aðhafst frekar í máli Sigfúsar. Hann hafi séð að sér og því sé ekki ástæða til að gera meira úr málinu.

Margir voru á því að aganefnd HSÍ hefði átt að taka mál Kára fyrir en bæði þjálfari Vals og Hauka voru sammála um það hefði verið klárt rautt spjald. Einar segir að málið hafi verið skoðað en framkvæmdastjóri HSÍ hefur vald til þess að skjóta málum til aganefndar telji hann ástæðu til.

„Við horfðum á þetta atvik og veltum fyrir okkur hvort það væri grundvöllur fyrir því að fara lengra með málið. Ef við hefðum gert það værum við að taka upp ný vinnubrögð sem við höfum ekki notað áður. Það var því ákveðið að láta kjurrt liggja," sagði Einar en aganefnd fundar daglega í kringum úrslitakeppnina komi einhver mál upp.

Aganefnd tekur fyrir þau mál sem koma í agaskýrslu dómara. Eftir fyrsta leikinn var ekkert um mál Kára. Einar sagðist ekki vita hvort dómarar leiksins hefðu horft á myndband af atvikinu áður en þeir fylltu út og skiluðu agaskýrslunni.

„Það er rosalega erfitt að vinna með myndbönd í því umhverfi sem við búum í. Stundum er ein myndavél á vellinum, stundum tvær og á einhverjum leikjum fimm," sagði Einar sem hefur ekki áður skotið máli til aganefndar þar sem brot sjást á myndbandi.

„Ef við ætluðum að fara slíka leið væri æskilegast að taka slíka ákvörðun fyrir tímabilið en ekki í miðri úrslitakeppni. Ég tel að það sé verkefni nýrrar stjórnar að taka ákvörðun hvaða leið menn vilja fara í þessum efnum," sagði Einar Þorvarðason, framkvæmdastjóri HSÍ.