Lokaðist inni í Fljótshlíðinni þegar flóðið brast á

Anna Runólfsdóttir, bóndi í Fljótshlíðinni, varð innlyksa í hlaupinu núna í kvöld. „Ég heyrði miklar drunur og ályktaði svo að það væri að koma nýtt flóð," segir Anna.

Anna segist hafa flýtt sér að setja eins mikið fé út og hægt hafi verið því þau hafi talið að það væri að koma stærra flóð en síðast. Hún hafi óttast að flóðið myndi ná bænum og fjárhúsinu, þannig að ákveðið hafi verið að setja lömb og gemlinga út.

Anna segist hafa verið orðin lokuð inni um tíma, þegar vatn flæddi yfir veginn frá bænum. Hún segir hins vegar að rafmagnslínur standi og þar af leiðandi sé vegurinn tæplega farinn.

Anna segir afar óheppilegt að gosið komi á þessum tíma því sauðburður sé nýhafinn. „Þetta var ekki kurteist gos. það vekur mann upp um miðja nótt og kemur á þessum tíma ársins," segir Anna.