NBA: Naumur sigur Lakers á Golden State

Los Angeles Lakers vann sigur á Golden State Warriors 124-121 í NBA-deildinni í nótt. Með góðri rispu í lokin ógnaði Golden State en komst ekki alla leið og Lakers hrósaði sigri.

Kobe Bryant var með 29 stig fyrir Lakers og Stephen Curry var með 29 stig fyrir Golden State.

Boston Celtics var í stuði á heimavelli gegn Detroit Pistons og vann 119-93. Stigaskor Boston dreifðist vel en þeir Paul Pierce, Ray Allen og Michael Finley voru með 15 stig hver. New York vann útisigur gegn Philadelphia þar sem Danilo Gallinari var með 21 stig.

Carmelo Anthony skoraði 45 stig fyrir Denver en það dugði ekki til sigurs gegn Houston sem vann sigur með körfu Aaron Brooks í lokin. Brooks skoraði 21 stig en Houston batt þarna enda á sex leikja sigurgöngu Denver.

Carlos Boozer skoraði 23 stig og tók 9 fráköst fyrir Utah sem vann Washington og þá vann New Orleans sigur á Los Angeles Clippers.

Úrslit næturinnar:

Golden State - LA Lakers 121-124

LA Clippers - New Orleans 100-108

Philadelphia - New York 84-94

Boston - Detroit 119-93

Houston - Denver 125-123

Utah - Washington 112-89