Hugsum um okkur en ekki Twente

Rafa Benitez, þjálfari Inter, vill sjá meiri ákafa í leik síns liðs er það mætir Twente í Meistaradeildinni í kvöld.

"Eftir eins og hálfs mánaðar vinnu erum við byrjaðir að sjá afraksturinn af vinnunni. Það eru vissulega framfarir hjá okkur en ég vil meira," sagði Benitez beittur.

"Við erum búnir að kortleggja Twente. Liðið spilar fínan bolta og leggur sig afar hart fram. Það er lífsnauðsynlegt fyrir okkur að mæta til leiks með réttu hugarfari því Twente vill örugglega fagna sigri í sínum fyrsta leik í Meistaradeildinni.

"Aðalatriðið er samt við. Ef við spilum okkar leik og leggjum okkur fram þá vinnum við. Ég vil ekki tala of mikið um andstæðingana eða aðlagast þeirra leik. Það sem skiptir máli er hvað við gerum."