Beckham: Ég naut þess mjög að spila leikinn

„Þetta var fínt og ég naut þess mjög að spila leikinn. Stuðningsmennirnir voru mér líka góðir og það var frábært að spila þennan leik fyrir fullum leikvangi og mikilli stemningu," sagði Beckham eftir 2-3 sigur Manchester United gegn AC Milan í fyrri leik liðanna í 16-liða úrslitum Meistaradeildar Evrópu á San Siro-leikvanginum í kvöld.

Beckham var í kvöld að spila í fyrsta skipti gegn United síðan hann yfirgaf herbúðir enska félagsins fyrir sjö árum síðan en hann telur að AC Milan eigi enn ágæta möguleika á að komast áfram í átta-liða úrslitin.

„Við fengum þrjú góð tækifæri til þess að jafna leikinn í lokin og það hefði vissulega sett okkur í betri stöðu. Þetta er hins vegar ekki búið og við förum í seinni leikinn á Old Trafford og reynum að ná hagstæðum úrslitum þrátt fyrir að við vitum að það verði erfitt," sagði Beckham.