NBA: Atlanta vann Boston einu sinni enn - sigurganga Denver á enda

Atlanta Hawks vann Boston Celtics í fjórða skiptið á tímabilinu í NBA-deildinni í körfubolta í nótt og vann þar með alla deildarleiki liðanna í fyrsta skiptið í ellefu ár. Cleveland Cavaliers og Los Angeles Lakers unnu bæði leiki sína í nótt en átta leikja sigurganga Denver Nuggets endaði í Oklahoma City.

Joe Johnson skoraði 16 af 27 stigum sínum í fjórða leikhlutanum þegar Atlanta Hawks vann 100-91 sigur á Boston Celtics og Atlanta er nú komið upp fyrir Boston í annað sætið í Austurdeildinni á eftir Cleveland. Jamal Crawford var með 28 stig fyrir Hawks en Paul Pierce skoraði mest fyrir Boston eða 35 stig.

Kevin Durant skoraði 30 stig þegar Oklahoma City endaði átta leikja sigurgöngu Denver með öruggum 101-84 heimasigri. Denver hefur ekki skorað svona fá stig í einum leik á tímabilinu en Chauncey Billups var stigahæstur með 19 stig.

LeBron James varð í þriðja sinn í síðustu sex leikjum aðeins einu frákasti frá þrefaldri tvennu þegar Cleveland Cavaliers vann 94-73 sigur á Indiana Pacers. James var með 22 stig, 13 stoðsendingar og 9 fráköst í leiknum.

Kobe Bryant skoraði 22 af 24 stigum sínum í seinni hálfleik þegar Los Angeles Lakers vann þriðja sigur sinn í röð nú 99-91 sigur á Philadelphia 76ers. Pau Gasol var með 19 stig og 10 fráköst og Ron Artest skoraði 18 stig en Allen Iverson skoraði 23 stig fyrir Philadelphia sem er það mesta sem hann hefur skorað á tímabilinu.

Úrslitin í NBA-deildinni í nótt:

Indiana Pacers-Cleveland Cavaliers 73-94

Philadelphia 76ers-Los Angeles Lakers 91-99

Atlanta Hawks-Boston Celtics 100-91

Detroit Pistons-Miami Heat 65-92

Minnesota Timberwolves-Los Angeles Clippers 111-97

New Jersey Nets-Washington Wizards 79-81

New Orleans Hornets-Chicago Bulls 106-108

Oklahoma City Thunder-Denver Nuggets 101-84

Houston Rockets-Portland Trail Blazers 104-100

San Antonio Spurs-Memphis Grizzlies 104-97

Utah Jazz-Sacramento Kings 101-94

Golden State Warriors-Charlotte Bobcats 110-121