Artest langar að spila í NFL-deildinni

Ólíkindatólið Ron Artest hjá LA Lakers íhugar nú alvarlega þann möguleika að reyna að komast að hjá liði í NFL-deildinni þegar körfuboltaferill hans er á enda.

Artest viðurkennir fúslega að hann geti verið klikkaður að halda að hann eigi möguleika á að spila í NFL-deildinni.

Áður en hann tekur ákvörðun um málið ætlar hann að ráðfæra sig við góða menn. Þar á meðal Terrell Owens, sem er einnig þekktur ólátabelgur.

"Terrell ætlar að hjálpa mér að fá úr því skorið hvort ég sé klikkaður eða hvort ég eigi raunverulega möguleika á þessu," sagði Artest.