Skal greiða sekt vegna vændis

Maður var dæmdur í Héraðsdómi Reykjavíkur í gær til að greiða áttatíu þúsund krónur í sekt vegna vændiskaupa. Annar maður, sem einnig var ákærður fyrir vændiskaup, var sýknaður.

Sá sem dæmdur var hafði verið ákærður fyrir að kaupa vændi í tvígang og greiða fyrir það fjörutíu þúsund krónur samtals. Hann var sakfelldur fyrir annað tilvikið.

Mennirnir kváðust hafa verið að greiða fyrir nudd. Stúlka sem í hlut átti sagðist hins vegar hafa í eitt skipti átt samfarir við þann sem dæmdur var, en mundi ekki við hverja sá sýknaði hafði átt samskipti. - jss