Dómgreindarleysi að koma með byssur í búningsklefann

Umdeildasti leikmaðurinn í NBA-boltanum í dag, Gilbert Arenas hjá Washington Wizards, segir það hafa verið dómgreindarleysi af sinni hálfu að koma með byssur í búningsklefann.

Hann var með þrjár byssur í læstu hólfi í skápnum sínum og reif eina fram er hann reifst við liðsfélaga sinn, Javaris Crittenton, sem einnig dró fram byssu.

„Ég viðurkenni að þetta var dómgreindarleysi af minni hálfu. Ég hefði ekki átt að koma með byssur í klefann. Ég tek það á mig," sagði Arenas við fjölmiðlamenn en hann vildi að öðru leyti lítið tjá sig um atvikið. Hann sagði það þó hafa verið blásið upp.

Hann mun hitta yfirvöld á morgun og gefa skýrslu um atvikið.

Gárungarnir hafa verið að grínast með að Wizards-liðið ætti að taka upp sitt gamla nafn - Washington Bullets - eftir þessa uppákomu.