Mourinho kallar Eyjafjallajökul Guðjohnsen

Jose Mourinho, stjóri Inter á Ítalíu, er engum líkur og sló á létta strengi á blaðamannafundi á æfingasvæði Inter í Mílanó í dag.

Mourinho var spurður hvort hann hefði áhyggjur fyrir leikinn gegn Bayern München í úrslitum Meistaradeildar Evrópu um helgina.

„Ég hef áhyggjur af Guðjohnsen," sagði hann, blaðamönnum til mikillar furðu.

„Ég veit ekki hvað eldfjallið heitir. Það er of erfitt. Þannig að það heitir Guðjohnsen."

Jose Mourinho og Eiður Smári Guðjohnsen þekkjast vel enda lék sá síðarnefndi undir stjórn Mourinho hjá Chelsea og urðu þeir til að mynda tvöfaldir Englandsmeistarar saman hjá félaginu.

„Ég hef áhyggjur af eldfjallinu. Ég vildi helst fara [til Madrídar] á föstudaginn en það gæti farið svo að við þyrftum að fara á morgun. Ég vildi helst halda áfram að vinna hér og er það mitt eina áhyggjuefni."

Úrslitaleikurinn fer fram á Santiago Bernabeu, heimavelli Real Madrid, á laugardasgskvöldið og gæti vel farið svo að það verði síðasti leikur Mourinho sem stjóri Inter. Mourinho hefur verið sterklega orðaður við stjórastöðuna einmitt hjá Real Madrid.

„Það er ekki satt að ég er þjálfari Real Madrid og ég vil gjarnan fá tvo eða þrjá daga eftir úrslitaleikinn til að íhuga framtíð mína."

„Það er ekkert sem Inter getur gert til að gera mig hamingjusamari í mínu starfi. Mér líður vel hjá félaginu. Þetta snýst um að ég sé ánægður og virtur í fótboltalandi þar sem ég hef átt í erfiðleikum undanfarin ár. En úrslitaleikurinn skiptir nú mestu máli."