Maicon spenntur fyrir Real

Maicon, leikmaður Inter, segist spenntur fyrir því að fá að fylgja Jose Mourinho til Real Madrid fyrir næsta tímabil.

Inter varð í gær Evrópumeistari eftir sigur á Bayern München, 2-0, í úrslitaleik Meistaradeildar Evrópu. Sterkar líkur eru á því að það hafi verið síðasti leikur Mourinho með Inter.

„Ég er með samning við Inter og vil virða hann," sagði Maicon. „En ef hann [Mourinho] vill fá mig til Real þá verðum við að sjá hvort að Moratti [forseti Inter] sé sammála því."

Maicon er 28 ára Brasilíumaður og hefur verið á mála hjá Inter síðan 2006 en þangað kom hann frá Monaco í Frakklandi.