Shaq sektaður um fjórar milljónir

Shaquille O'Neal leikmaður Boston Celtics í NBA-deildinni í körfubolta, fékk væna sekt fyrir að drulla yfir dómara á dögunum. Hann var þá mjög ósáttur þegar hann fékk sína sjöttu villu í glímu sinni við Dwight Howard, miðherja Orlando Magic, í leik liðanna um helgina.

Dwight Howard féll þá í jörðina við litla snertingu eftir að þeir félagar hlupu saman upp völlinn. Shaquille O'Neal náði aðeins að spila í 12 mínútur og 39 sekúndur í leiknum og var bara með 2 stig og 1 frákast á þeim tíma. Howard gekk reyndar ekki mikið betur en fékk að spila talsvert meira en gamli karlinn sem var í villuvandræðum allan leikinn.

„Ég velti því fyrir mér af hverju ég hef aldrei fengið svona villu á mótherja mína á mínum 20 árum í deildinni. Dómarar eiga ekki að velja sér á hverja þeir dæma og á hverja þeir dæma ekki. Svona hlutir gerast bara af því að það eru menn að dæma sem vilja stjórna öllu," lét Shaquille hafa eftir sér eftir umræddan leik á móti Orlando.

NBA-deildin sektaði Shaquille O'Neal um 35 þúsund dollara eða um fjórar milljónir íslenskra króna.