Varaforsetinn hrinti þjálfaranum

Sérkennilegt mál skyggir á sigur Chicago Bulls í nótt. John Paxson, varaforseti félagsins, er sagður hafa hrint þjálfaranum Vinny Del Negro eftir leik í síðasta mánuði.

„Ég ætla ekki að tjá mig um þetta mál. Ég held áfram mínu starfi á hverjum degi sama hvað hefur gerst," segir Del Negro.

Paxson er sagður hafa ýtt tvívegis harkalega í bringuna á Del Negro eftir leik gegn Phoenix þann 30. mars. Paxson var víst ósáttur við hve mikið Joakim Noah spilaði í leiknum þrátt fyrir að vera að glíma við meiðsli.

Fjölmiðlar vestanhafs hafa reynt að ná í Paxson vegna málsins en án árangurs. Þjálfarasæti Del Negro hefur verið ansi heitt í vetur og er þetta mál talið auka líkurnar enn frekar á því að hann verði látinn taka pokann sinn bráðlega.