Barcelona kláraði skylduverkið

Barcelona er komið áfram í undanúrslit Meistaradeildar Evrópu með 1-0 sigri á Shakhtar Donetsk á útivelli og því samanlagt, 6-1.

Lionel Messi skoraði eina mark leiksins á 43. mínútu með skoti í vítateignum. Hann fékk boltann frá Dani Alves í teignum og náði að skila boltanum í netið með liprum töktum þrátt fyrir að hafa verið með þrjá varnarmenn í sér.

Barcelona er því komið áfram í undanúrslitin fjórða árið í röð og í fimmta sinn á síðustu sex árum. Sigurinn í kvöld var skylduverk fyrir Börsunga sem unnu í kvöld sinn fyrsta leik á útivelli í Meistaradeildinni undir stjórn Pep Guardiola.

Barcelona mætir annað hvort Real Madrid eða Tottenham í undanúrslitunum en liðin mætast annað kvöld. Madrídingar eru með 4-0 forystu í rimmunni eftir fyrri leik liðanna í fjórðungsúrslitunum.