Klitschko þaggaði niður í Haye

Úkraínumaðurinn Wladimir Klitschko vann sigur á Bretanum David Haye í kvöld er þeir mættust í þungarvigtarbardaga í Hamburg. Haye hefur rifið stólpakjaft við Klitschko-bræðurna í nokkur ár en tókst ekki að standa við stóru orðin í kvöld þó svo hann hefði byrjað bardagann vel.

Það var mikil dramatík í aðdraganda bardagans. David Haye lét bíða heillengi eftir sér. Áhorfendur í Hamborg launuðu honum það með því að baula hraustlega er hann kom loksins í salinn í nýum varabúning enska knattspyrnulandsliðsins.

David Haye var mun sprækari framan af á meðan Klitschko virtist vera með hægri höndina í fatla. Hann hreinlega neitaði að nota hana.

Hinn agaði Klitschko kom þó inn í bardagann af afli í fimmtu lotu. Eftir því sem Haye þreyttist fór Klitschko að sækja meira og taka frumkvæðið í bardaganum.

Síðustu loturnar voru mjög jafnar en Klitschko þó alltaf aðeins beittari. Enda fór svo að allir dómararnir dæmdu Klitschko sigur.