Horner: Vettel hungraður í sigur

Christian Horner hjá Red Bull segir að þrátt fyrir að Sebastian Vettel sé með gott stigaforskot í stigamóti Formúlu 1 ökumanna, þá stefni hann á sigur í hverri keppni sem hann tekur þátt í. Vettel er 85 stigum á undan Mark Webber, liðsfélaga sínum hjá Red Bull.

Formúlu 1 ökumenn eru í sumarfríi þessa dagana, en næst verður keppt um aðra helgi á Spa brautinni í Belgíu.

„Hann er aðdáunarverður þegar það er álag á honum og kemur mér sífellt á óvart þegar álagið er mikið", sagði Horner um Vettel í frétt á autosport.com.

Vettel hefur náð stigum í öllum 11 mótum ársins á árinu og lakasti árangur hans er fjórða sæti í þýska kappakstrinum í liðnum mánuði, en annars hefur hann ætið komist á verðlaunapall í mótum.

„Hann (Vettel) varð fjórði í Þýskalandi, en ef skoðaður er árangur keppinauta hans, þá hefur þeim gengið mun verr þegar verst gekk. Hann hefur náð sex sigrum, tvisvar verið öðru sæti og svo fjórða. Það er ekki slæmt og hann hefur getað unnið þrjú mót til viðbótar."

„Hann (Vettel) tapaði í síðasta hring í Kanada og tapaði í Kína í lokin og á Silverstone var hann í forystu þar til tjakkur bilaði (í þjónustuhléi). Eina mótið sem hann leiddi ekki var á Nürburgring og það er í sjálfu sér merkileg tölfræði.

Vettel hefur verið spurður á því reglulega á mótshelgum hvort hann ætli að slaka á klónni í ljósi stigaforystunnar, en hann getur landað titlinum þó hann nái bara þriðja sæti í þeim átta mótum sem eftir eru. En Vettel vill stefna á toppárangur í hverri keppni.

„Þannig mætir hann í hverja keppni. Hann verður að sækja. Hann er hungraður í sigur", sagði Horner um málið.

„Hann er nógu skynsamur til að vita að þegar hann getur ekki unnið, þá þarf hann að ná í stig. En markmið hans er að vinna öll mót sem hann tekur þátt í", sagði Horner.