Button telur tilkomumikill tilþrif möguleg á Monza brautinni um helgina

Jenson Button hjá McLaren varð í þriðja sæti í síðustu Formúlu 1 keppni sem var á Spa brautinni í Belgíu, en um helgina keppir hann á Monza brautinni á Ítalíu. Button varð í öðru sæti á eftir Fernando Alonso á Ferrari á Monza brautinni í fyrra, en Felipe Massa á Ferrari varð þriðji.

Á Monza brautinni verður leyft á tveimur stöðum að opna stillanlegan afturvæng keppnisbílanna í kappakstrinum, til að auðvelda framúrakstur. Það er í annað skiptið á árinu sem slíkt er leyft, en í öðrum mótum hefur aðeins eitt svæði boðið upp þetta atriði.

Þegar ökumaður opnar stillanlegan afturvænginn á fyrirfram ákveðnum svæðum þá eykst hámarkshraðinn, en slíkt mega ökumenn gera séu þeir einni sekúndu, eða innan við það á eftir keppinaut í brautinni á þessu svæði. Á æfingum og í tímatökum er notkun stillanlegs afturvængs frjáls.

Button telur að það verði það sama upp á teningnum og í fyrri mótum á Monza að finna þurfi hinn gullna meðalveg í uppstillingu bílanna og yfirbyggingar hvað niðurtog varðar. Í fyrra segir Button að Lewis Hamilton, liðsfélagi hans hafi farið þá leið að hafa lítið niðurtog, en Button kaus sjálfur meira grip á kostnað hámarkshraðans.

„Þetta þýddi að þó ég næði góðum aksturstíma, þá gat ég ekki barist um toppsætið, af því komst ekki nógu nærri keppinautnum á beinu köflunum til að reyna framúrakstur", sagði Button í fréttatilkynningu frá McLaren um mótið í fyrra og sagði m.a. um mótið í ár:

„Í annað skiptið á þessu ári þá verða tvö svæði sem nota má stillanlegan afturvænginn, og því tvö svæði sem gefa möguleika á framúrakstri. Fyrra svæðið verður áhugavert, því það hefur alltaf verið erfitt að slást um sæti á bremsusvæðinu við Ascari beygjuna. Brautin er mjó og aðkoman að beygjunni hröð. Það verður fróðlegt að sjá hvernig stillanlegi afturvængurinn virkar þarna. Það gætu orðið tilkomumikil tilþrif!"

„Ég held að hefðbundnari tilraunir til framúraksturs verði í hinu svæðinu sem nota má stillanlegan afturvænginn. Það er eftir Parabolica beygjuna, en það verður þó ekki auðvelt að reyna. Það þarf að halda góðri ferð gegnum beygjuna og inn á rás-og endmarkskaflann og reyna framúraksturs í fyrstu beygju brautarinnar. Það verður mikill kostur að geta notað afturvænginn og gæti skapað áhugaverða þróun mála í kappakstrinum", sagði Button.