Vettel er ekkert kappsmál að landa meistaratitlinum um helgina

Sebastian Vettel hjá Red Bull liðinu segir enga auka pressu á sér að reyna vinna meistaratitil ökumanna í Formúlu 1 í Singapúr um helgina. Hann á möguleika á því ef hann nær 125 stiga forskoti á næsta ökumann í stigamótinu, jafnvel þó fimm mót verði enn eftir, þegar mótinu í Singapúr er lokið. Vettel er núna með 112 stiga forskot á Fernando Alonso hjá Ferrari í stigamóti ökumanna. Vettel ræddi stöðuna í meistarakeppninni á fréttamannafundi í Singapúr í dag.

Aðspurður um hugleiðingar sínar varðandi það að hann geti landað titlinum í Singapúr sagði Vettel meðal annars:

„Við höfum ekki unnið neitt ennþá. Við erum í góðri stöðu, en það er nokkuð í land ennþá. Við verðum gera okkar besta í kappakstrinum. Þetta er ein erfiðasta brautin fyrir bílinn og fyrir ökumenn. Það er löng, löng leið að köflótta flagginu ", sagði Vettel og átti þá við að það væri löng leið að endamarkinu í mótinu í Singapúr.

Vettel sagði einnig að það væri ekki markmiðið um helgina að ná titlinum, heldur að hámarka árangurinn og þá væri spurning hvort eitthvað óvænt fylgdi í kjölfarið.

„Markmið okkar fyrir tímabilið var að verja titilinn. Það er engin ástæða að breyta því markmiði. Það skiptir ekki máli hvenær það næst, bara að það gerist og við erum að vinna að því."

Vettel var spurður að því hvort einhver pressa væri á honum að ná titilinum í Singapúr mótinu og hann svaraði m.a. með eftirfarandi orðum:

„Það er alltaf pressa á mér og okkur, því við viljum ná sem allra bestum árangri hverja einustu mótshelgi. Þannig að ef það er möguleiki á sigri, þá stefnum við á það. Ég finn ekki fyrir neinni aukinni pressu að reyna vinna meistaratitilinn hérna, eða að reyna vinna hann á einhverjum tilteknum stað."