Öll úrslit kvöldsins: Torres sjóðheitur - Ramsey hetja Arsenal

Fernando Torres skoraði í kvöld sín fyrstu Meistaradeildarmörk fyrir Chelsea er liðið vann 5-0 stórsigur á belgíska liðinu Genk á heimavelli. Aaron Ramsay var hetja Arsenal sem vann 1-0 sigur á Marseille á útivelli í kvöld.

Ramsay skoraði sigumark Arsenal á 92. mínútu eftir að hann hafði komið inn á sem varamaður seint í seinni hálfleik. Sannarlegur dramatískur endir á annars bragðdaufri viðureign.

AC Milan og Barcelona höfðu óvenju hægt um sig í kvöld en bæði lið unnu þó þægilega 2-0 sigra í H-riðli. AC Milan mætti þá BATE Borisov en Barcelona tók á móti Viktoria Plzen frá Tékklandi.

Chelsae slátraði Genk

Andre-Villas Boas, stjóri Chelsea, kom mörgum á óvart með því að setja leikmenn eins og John Terry, Juan Mata, Didier Drogba og Daniel Sturridge út úr byrjunarliðinu. Alls gerði hann sex breytingar á liðinu frá leiknum gegn Everton en Fernando Torres, sem tekur nú út þriggja leikja bann í ensku úrvalsdeildinni, var í fremstu víglínu í kvöld.

Hafði einhver áhyggjur af þessum breytingum voru þær algerlega óþarfar því að leikmenn Chelsea gerðu út um þennan leik snemma í fyrri hálfleik.

Raul Meireles kom þeim bláklæddu á bragðið með góðu langskoti áður en að Torres skoraði sín tvö mörk og kom Chelsea í 3-0 áður en 30 mínútur voru liðnar. Torres var þá þegar búinn að eiga skot í stöng áður en hann skoraði, fyrst eftir stungusendingu Frank Lampard og svo skallaði hann boltann í netið eftir fyrirgjöf Meireles.

Branislav Ivanovic bætti svo fjórða markinu við áður en fyrri hálfleiknum lauk, með skalla eftir fyrirgjöf Florent Malouda úr aukaspyrnu.

Salomon Kalou skoraði fimmta mark Chelsea undir lok leiksins er hann fylgdi eftir skoti Fernando Torres sem var varið. Spánverjinn knái var öflugur í kvöld og nálægt því að ná þrennunni.

Í hinum leik riðilsins vann Leverkusen 2-1 sigur á Valencia og tók þar með stórt skref í átt að 16-liða úrslitunum, rétt eins og Chelsea í kvöld.

Ramsay hetjan í Marseille

Arsene Wenger háði margar eitraðar rimmur gegn Marseille þegar hann var stjóri Monaco fyrir hálfum öðrum áratug síðan en hann náði þó aldrei að vinna leik á Stade Velodrome, heimavelli Marseille. Það breyttist í kvöld þó svo að það hefði staðið afar tæpt.

Aaron Ramsey var óvænt settur á bekkinn hjá Arsenal en Robin van Persie, sem skoraði bæði mörk liðsins í 2-1 sigri á Sunderland um helgina, var á sínum stað í sókninni.

Heimamenn vildu fá vítaspyrnu snemma leiks og sýndu endursýningar í sjónvarpi að þeir höfðu talsvert til síns máls. Carl Jenkinson, varnarmaður Arsenal, handlék knöttinn í eigin vítateig en dómari leiksins sá greinilega ekkert og spjaldaði einn leikmann Marseille fyrir mótmæli.

Arsenal hefði getað komist yfir stuttu síðar er Robin van Persie skallaði hornspyrnu Mikel Arteta að marki en Soulemane Diawara bjargaði á línu fyrir heimamenn. Í sömu sókn virtist leikmaður Marseille hafa handleikið knöttinn í teignum en aftur var ekkert dæmt.

Marseille átti þó nokkrar ágætar sóknir í fyrri hálfleik án þess þó að hafa skapað sér mörg góð færi.

Síðari hálfleikur var að mestu tíðindalítill en Ramsay kom loksins inn á sem varamaður á 78. mínútu fyrir Andrey Arshavin. Boltinn barst til hans eftir fyrirgjöf frá hægri og gerði Ramsey engin mistök og skoraði af öryggi í nærhornið með hnitmiðuðu skoti.

Léttirinn mikill hjá leikmönnum Arsenal sem komst með þessum sigri upp fyrir Marseille og þar með á topp riðilsins.

Í hinum leik riðilsins vann Olympiakos sannfærandi 3-1 sigur á Þýskalandsmeisturum Dortmund sem sitja í neðsta sæti F-riðils með eitt stig. Stigin þrjú sem Grikkirnir fengu í kvöld voru þau fyrstu sem liðið fékk á tímabilinu.

E-riðill:

Bayer Leverkusen - Valencia 2-1

0-1 Jonas (24.)

1-1 Andreas Schürrle (52.)

2-1 Sydney Sam (56.)

Chelsea - Genk 5-0

1-0 Raul Meireles (8.)

2-0 Fernando Torres (11.)

3-0 Fernando Torres (27.)

4-0 Branislav Ivanovic (42.)

5-0 Salomon Kalou (72.)

F-riðill:

Marseille - Arsenal 0-1

0-1 Aaron Ramsey (92.)

Olympiakos - Dortmund 3-1

1-0 Jose Holebas (8.)

1-1 Robert Lewandowski (26.)

2-1 Rafik Djebbour (40.)

3-1 François Modesto (78.)

G-riðill:

Shakhtar Donetsk - Zenit St. Pétursborg 2-2

1-0 Willian (15.)

1-1 Roman Shirokov (33.)

2-1 Luiz Adriano (45.)

2-2 Viktor Fayzulin (60.)

Porto - APOEL Nicosia 1-1

1-0 Hulk (13.)

1-1 Ailton (19.)

H-riðill:

AC Milan - BATE Borisov 2-0

1-0 Zlatan Ibrahimovic (35.)

2-0 Kevin-Prince Boateng (70.)

Barcelona - Viktoria Plzen 2-0

1-0 Andrés Iniesta (10.)

2-0 David Villa (82.)