Hrafn: Erfitt að eiga við okkur í þessum ham

Hrafn Kristjánsson, þjálfari KR, var virkilega ánægður með leik sinna manna í kvöld. KR vann öruggan sigur á Njarðvík ,71-91, í 16.umferð Iceland-Express deild karla í ljónagryfjunni í kvöld.

„Ég er mjög ánægður með sigurinn og spilamennskuna hjá strákunum. Liðið var að spila eftir þeim varnaráherslum sem lagt var upp með fyrir leik," sagði Hrafn.

„Það er gaman að horfa á þetta lið spila körfubolta þegar við leggjum okkur svona mikið fram. Það eru gríðarlega vinnusamir leikmenn í þessu liði sem bera sig eftir björginni og þegar við erum í slíkum ham þá er ofboðslega erfitt að eiga við okkur".

„Ég er mjög ánægður með allt yfirbragð á liðinu þessa daganna og vonandi munum við toppa á réttum tíma," sagði Hrafn Kristjánsson, mjög svo ánægður eftir sigurinn í kvöld.