UEFA kærir Gattuso fyrir alvarlega óíþróttamannslega hegðun

Knattspyrnusamband Evrópu, UEFA, hefur kært AC Milan manninn Gennaro Gattuso fyrir alvarlega óíþróttamannlega hegðun eftir að ítalski miðjumaðurinn skallaði aðstoðarþjálfara Tottenham eftir Meistaradeildarleik AC Milan og Tottenham á þriðjudagskvöldið. Tottenham vann leikinn 1-0 á San Siro.

Eins og frægt er orðið þá missti hinn blóðheiti Gattuso algjörlega stjórn á sér eftir orðaskipti við Joe Jordan, aðstoðarmann Harry Redknapp. Hann tók Jordan fyrst hálstaki í miðjum leik og skallaði síðan Jordan þegar allt varð vitlaust þegar komið var að því að þakka fyrir leikinn.

Aganefnd UEFA mun taka málið fyrir á mánudaginn kemur en lágmarksrefsing er einn leikur fyrir óíþróttamannslega hegðun og þrír leikir fyrir að ráðast á aðra leikmenn í leik. Bann Gattuso verður þó líklega enn lengra enda er öllum ljóst að UEFA mun taka hart á svona hegðun.

Það er þegar ljóst að Gattuso verður í banni í seinni leiknum á móti Tottenahm sem fer fram á White Hart Lane 9. mars næstkomandi eftir að hann fékk gult spjald í umræddum leik.