Reykjavíkurapótek selt á 100 milljónir

Hið fornfræga hús við Austurstræti 16, sem kennt er við Reykjavíkurapótek, var selt á nauðungaruppboði í gær. Gengið var að eina boðinu, sem kom frá slitastjórn Frjálsa fjárfestingarbankans og hljóðaði upp á hundrað milljónir króna.

Húsið var í eigu A16 fasteignafélags, sem er alfarið í eigu Karls Steingrímssonar í Pelsinum. Hann hefur átt húsið síðan 1995.

Karl hefur frest til 15. febrúar til að reyna að ná samningum um málið til að halda eigninni. „Eigum við ekki að vona það besta,“ segir hann spurður hvort hann ætli að láta á það reyna eða hvort hann líti svo á að hann hafi misst húsið.

Hundrað milljóna kauptilboð Frjálsa fjárfestingarbankans hefur litla þýðingu, enda er bankanum skylt að gefa eftir skuldir sem hvíla á húsinu í samræmi við markaðsvirði þess. Ljóst er að það er miklum mun hærra en milljónirnar hundrað.

Karl segist ekki gera sér grein fyrir því hvers virði húsið er. „Maður veit það aldrei fyrr en við sölu,“ segir hann. Húsið er 2.772 fermetrar, fasteignamat þess er um 285 milljónir en brunabótamatið nálægt milljarði. Fasteignasali sem Fréttablaðið ræddi við sagðist telja að markaðsvirði þess væri líklega ekki undir 750 milljónum.

Frjálsi fjárfestingarbankinn er með 870 milljóna króna veð í húsinu og er með fyrsta veðrétt ásamt Avant.

Nauðungaruppboð á húsinu fór fram í janúar síðastliðnum að kröfu Arion banka, sem á annan veðrétt í eignina. Arion banki bauð 300 milljónir en uppboðið reyndist árangurslaust, enda var kauptilboðið fjarri því að duga fyrir skuldunum við fyrstu veðréttarhafa og því hefði Arion banki ekkert fengið í sinn hlut.

Karl biðst undan því að ræða málið mikið frekar að sinni. „Þetta er voðalega viðkvæmt fyrir okkur. Við ráðum ekki við þetta blessaða umhverfi okkar í dag. Það eru allir fórnarlömb í þessu,“ segir hann.

Karl seldi í febrúar aðra merka eign, Kirkjuhvol við Kirkjutorg, þar sem verslunin Pelsinn er til húsa.

stigur@frettabladid.is