Twitter og Google takast á

Talsmenn samskiptasíðunnar Twitter hafa lýst yfir óánægju með þær breytingar sem tæknifyrirtækið Google hefur gert á leitarvél sinni. Niðurstöður leitarvélarinnar munu nú birta upplýsingar af samskiptasíðunni Google+.

Alex Macgillivray, lögmaður Twitter, sagði að breytingarnar kæmu til með að hafa afar slæm áhrif á internetið í heild sinni. Hann sagði að fólk hafi árum saman notast til leitarvél Google í von um að finna óritskoðaðar niðurstöður. Hann telur að sá tími sé á enda.

Samskiptasíða Google var sett á laggirnar á síðasta ári og er henni ætlað að vera í beinni samkeppni við Facebook. Talsmenn Google segja að breytingar verði til þess að samskiptasíða þeirra verði sjáanlegri.

Macgillivray segir að Google sé að misnota ráðandi stöðu sína á internetinu.

Google svaraði ummælum Twitter fullum hálsi á samskiptasíðunni Google+. Í yfirlýsingunni lýsa talsmenn Google undrun sinni á gagnrýninni enda hafi Twitter ekki framlengt þjónustusamning sinn við Google. Í staðinn notast Twitter við leitarvélina Bing! en þar eru færslur Twitter-notenda skráðar.