Ecclestone vill gefa litlu liðunum tækifæri

Bernie Ecclestone, alráður í Formúlu 1, vill gefa minni liðum tækifæri til að vera samkeppnishæfari í þeim harða heimi sem þessi efsta deild mótorsports er.

"Ef við takmörkum nauðsyn liðanna til að eyða peningum, gætu litlu liðin vel staðið sig betur," sagði Bernie í viðtali við Sky Sports. "Það sem ég hef lagt til er að neðstu liðin í deildinni fái til afnota bílana sem heimsmeistararnir notuðu árið áður."

Ecclestone hefur í mörg ár reynt að skapa vænlegra umhverfi fyrir ný og fátækari lið til að ná árangri í Formúlu 1. Til að ná fram þessum markmiðum sínum hefur hann unnið náið með FIA (Alþjóða akstursíþróttasambandinu) um víðtækar reglubreytingar til að takmarka kostnaðinn við að reka lið.

Þessar hugmyndir Bernie um að færa litlu liðinum bestu bíla ársins á undan eru þó með þeim róttækari sem þessi 81 árs gamli refur hefur lagt til.