De la Rosa skipaður formaður GPDA

Spænski ökuþórinn Pedro de la Rosa var í dag skipaður formaður GPDA sem eru hagsmunasamtök ökumanna í Formúlu 1. Samtökin taka á helsta hagsmunamáli ökuþóra sem er öryggi þeirra.





Á undanförnum árum hafa samtökin tekið virkari þátt í öðrum málum Formúlunnar, þá helst um framtíð mótaraðarinnar.





De la Rosa tekur við af Rubens Barrichello sem missti sæti sitt hjá Williams í lok ársins og ekur í bandarísku IRL mótaröðinni í sumar. GPDA þurfti því að finna sér nýjan formann. De la Rosa hefur áður verið formaður samtakanna árin 2008 til 2010.





"Ég held að samtökin séu mikilvægari en fólk geri sér grein fyrir," sagði de la Rosa. Í stjórn félagsins sitja þrír ökumenn í Formúlu 1 og er einn af þeim formaður. Áætlað er að kjósa í stjórnina í Ástralíu eftir tæpar tvær vikur og er gert ráð fyrir að Felipe Massa og Sebastian Vettel verði endurkjörnir.





Samtökin voru stofnuð í sinni núverandi mynd eftir dauða Ayrton Senna og Roland Ratzenberger árið 1994. Michael Schumacher veitti samtökunum forystu frá stofnun til 2005.