Endurhannaður iPhone væntanlegur

Nýr iPhone verður kynntur til leiks í næstu viku. Apple hefur boðað til blaðamannafundar 12. september næstkomandi og þykir það nær öruggt að nýjasta kynslóð snjallsímans verði afhjúpuð. Þó svo að Apple hafi ekki staðfest neitt varðandi hönnun og búnað símans hafa ýmsar upplýsingar um útlit hans og innvols komið fram.

„iPhone 5" eða „Nýi iPhone"

Þvert á óskir Steve Jobs, guðföðurs Apple, ákvað fyrirtækið að halda ekki í hefðina þegar nýjustu útgáfur iPad spjaldtölvunnar og iPhone voru opinberaðar. Snjallsíminn var kynntur sem iPhone 4S og iPad sem Nýi iPad.

Hvað verður þá um iPhone? Staðreyndin er sú að sjötta kynslóð snjallsímans lítur dagsins ljós á miðvikudaginn — það þykir þó afar ólíklegt að Apple muni kynna hann sem iPhone 6. Fyrirtækið mun frekar horfa til neytenda og einfaldlega skýra tækið „iPhone 5."

Ál og meira ál

Mikið hefur verið rætt um skjástærð iPhone 5. Því hefur verið haldið fram að Apple muni fylgja suður-kóreska raftækjaframleiðandanum Samsung og bjóða upp á mun stærri skjá en áður. Nú er talið að Apple muni sannarlega stækka skjáinn en aðeins á lengdina. Breiddin verður sú sama en hlutföllin önnur.

Myndavélin á framhlið símans hefur verið færð og situr hún nú fyrir miðju eða rétt fyrir ofan hátalarann. Þá verður umgjörð iPhone 5 búin til úr heilu álstykki og sem fyrr verður síminn fáanlegur í svörtu og hvítu.

Hvað varðar snertiskjáinn mun Apple líklega nýta sér IGZO-tæknina sem Sharp hefur þróað síðustu misseri. Slíkur skjár notar mun minni smára (transistor) en fyrri týpur. Snertiskjárinn eyðir því minni orku og er jafnframt þynnri.

Nýtt stýrikerfi

iPhone 5 verður knúinn af iOS 6 stýrikerfinu. Fregnir herma að Apple hafi endurhugsað viðmót kerfisins ásamt því að segja skilið við Google Maps staðsetningarhugbúnaðinn. Þess í stað mun Apple kynna spánýtt kortaviðmót sem notast við upplýsingar frá gervitunglum fyrirtækisins. Þá verður samskiptamiðillinn Facebook gerður að miðlægu forriti í iOS 6, rétt eins og Twitter.

Ný tengibraut og aukahlutir úreltir

Það lagðist misvel í menn þegar ný tengibraut iPhone snjallsímans var kynnt. Tengið sem um ræðir er margfalt minna en það sem finna má á fyrri útgáfum iPhone, iPod og iPad spjaldtölvunum. Þetta þýðir að aukahlutir sem áður var hægt að nota með iPhone 4S og fyrri útgáfum verða úrelt. Apple og aðrir söluaðilar munu þó að öllum líkindum bjóða upp á spennubreyta fyrir iPhone 5 svo að hægt verði að nota eldri aukahluti.