Rooney. Getum ekki verið með vanmat

Wayne Rooney, framherji Man Utd, segir að liðið geti ekki leyft sér neitt vanmat gegn rúmenska liðinu Cluj í Meistaradeildinni. Ef liðið falli í þá gildru gæti farið illa eins og á síðustu leiktíð er liðið komst ekki upp úr riðlakeppninni.

United marði sigur á Galatasaray í opnunarleik sínum í Meistaradeildinni og á morgun er útileikur gegn Cluj.

"Meistaradeildin er gjörólík ensku úrvalsdeildinni. Ef lið eru ekki upp á sitt besta þá er þeim refsað. Við lentum í því í fyrra. Slíkt má aldrei gerast aftur þannig að þetta er risaleikur fyrir okkur," sagði Rooney.

"Vonandi náum við í sigur og komum okkur strax í þægilega stöðu í riðlinum."

Sir Alex Ferguson, stjóri Man. Utd, hefur líka staðfest að hann ætli ekki að taka neinar áhættur í leiknum og teflir því fram sterku liði í leiknum.