Bale ekki með Tottenham í kvöld

Tottenham mætir gríska liðinu Panathinaikos í kvöld í Evrópudeildinni og fer leikurinn fram á White Hart Lane í London. Leikur liðanna er hreinn úrslitleikur um hvort liðið fylgir Lazio upp úr J-riðli keppninnar. Aðalstjarna Tottenham, Gareth Bale, verður ekki með vegna meiðsla aftan í læri og er það mikið áfall fyrir Spurs.

Þá er Michael Dawson einnig meiddur og þá er búist við að Brad Friedel standi í markinu en Hugo LIoris hefur leikið síðustu fimm leiki Tottenham. Gylfi Þór Sigurðsson er í leikmannahópi Tottenham en hann Dawson hafa skorað sitthvort markið í keppninni og Jermain Defoe hefur sett þrjú.

Grikkirnir verða að sigra í leiknum til að komast áfram á kostnað Tottenham en enska liðið hefur 7 stig fyrir lokaumferðina í öðru sæti en Panathinaikos hefur 5 í þriðja. Lazio er efst með 9 stig og er komið áfram. Leikur liðanna í kvöld verður sýndur beint á Stöð2 Sport klukkan 20.00.