Tal þarf að draga verulega saman

Póst- og fjarskiptastofnun (PFS) hefur ákveðið að Tal verði að lækka lúkningargjöld sín úr 12,5 í 5,5 krónur á mínútu. Frá og með næstu áramótum eiga þau síðan að lækka niður í 4,0 krónur á mínútu. Forstjóri fyrirtækisins segir að ákvörðunin setji verulegt strik í reikninginn hjá Tali, sem hefur áfrýjað henni.

Tal hefur verið starfandi frá árinu 2006 en þorra þess tíma var fyrirtækið endursöluaðili á þjónustu Vodafone. Á árinu 2010 komu nýir eigendur að Tali og gerðu kaupleigusamning um farsímastöðu við Símann. Frá þeim tíma hefur Tal rukkað 12,5 krónur á mínútu í lúkningargjöld, en slík gjöld eru greidd þegar viðskiptavinir annarra símafyrirtækja hringja í viðskiptavini Tals. Á grundvelli þeirra breytinga sem urðu á viðskiptamódeli Tals þegar símstöðin var keypt vildu forsvarsmenn fyrirtækisins fá að rukka hin háu lúkningargjöld áfram í nokkur ár í viðbót áður en þau yrðu lækkuð í takt við það sem samkeppnisaðilar þeirra rukka. Í samtali við Markaðinn 26. október 2011 sagði Viktor Ólason, forstjóri Tals, að framtíðarrekstrarhæfi fyrirtækisins ylti á því hvernig PFS myndi meðhöndla kröfuna.

Um miðjan janúar síðastliðinn tilkynnti PFS að stofnunin mæli fyrir því að lúkningargjald Tals lækki í 5,5 krónur á mínútu eigi síðar en 1. mars næstkomandi. Auk þess hefur PFS tekið ákvörðun um að lúkningargjöld allra íslenskra símafyrirtækja eigi að verða í mesta lagi 4,0 krónur frá og með 1. janúar 2013.

Að sögn Viktors setur þessi ákvörðun verulegt strik í reikninginn hjá Tali. „Við áfrýjuðum þessari ákvörðun til áfrýjunarnefndar póst- og fjarskiptamála í síðustu viku og bíðum viðbragða þaðan um hvort hún standi. Þetta setur verulegt strik í reikninginn en við höfum haft tíma til að bregðast við og erum að vinna að nokkrum málum þar að lútandi."

Viktor segir að ákvörðunin hafi strax tekið gildi en í henni eru ákvæði um að það sé hægt að fresta réttarfarsáhrifum hennar. Tal hefur sótt um slíkt þar til endanleg niðurstaða liggur fyrir í málinu. Samkvæmt Viktori skilaði Tal hagnaði á árinu 2011 en að ákvörðun PFS muni hafa þau áhrif að það þurfi að draga verulega saman í rekstri fyrirtækisins til að endar nái saman á þessu ári. „Við þurfum að endurhugsa okkar framtíðarstefnu. Félagið fór út í það að kaupa símstöð til að koma inn á þennan markað hafandi séð hvernig önnur fyrirtæki hafa verið afgreidd með ákveðinni lengd á lúkningarframkvæmdum til að ná fjárfestingu sinni til baka. Þessi ákvörðun kippir stoðunum undan því."