Fótbolti

Rio ekki refsað fyrir dómara-klappið

Óskar Ófeigur Jónsson skrifar
Rio Ferdinand reynir hér að dekka Cristiano Ronaldo í leiknum á Old Trafford.
Rio Ferdinand reynir hér að dekka Cristiano Ronaldo í leiknum á Old Trafford. Mynd/Nordic Photos/Getty
Rio Ferdinand, leikmaður Manchester United, verður ekki refsað af UEFA fyrir hegðun sína eftir tapleik United á móti Real Madrid í Meistaradeildinni á þriðjudagskvöldið. Enski miðvörðurinn var afar pirraður út í dómarann eftir leikinn.

Það sást vel í sjónvarpsútsendingunni frá leiknum þegar Rio Ferdinand stillti sér upp fyrir framan tyrkneska dómarann og klappaði fyrir honum í augljósri kaldhæðni.

Tyrkneski dómarinn Cuneyt Cakir hafði rekið Nani útaf þegar Manchester United var í góðum málum með 1-0 forystu og Real Madrid liðið nýtt sér það og tryggði sér sigurinn og þar með sæti í átta liða úrslitum Meistaradeildarinnar.

Cuneyt Cakir gerði hinsvegar enga athugasemd við hegðun Ferdinand í dómaraskýrslu leiksins og því mun UEFA ekki gera neitt í málinu.

Það sást líka í sjónvarpinu þegar Rio Ferdinand þakkaði Cuneyt Cakir fyrir leikinn skömmu eftir að hafa klappað svo eftirminnilega fyrir honum.

Enski boltinn Meistaradeild Evrópu

Mest lesið


Fleiri fréttir

Sjá meira


×

Mest lesið