Eigandi Red Bull segir F1 ekki snúast um keppnina lengur

Dietrich Mateschitz, eigandi Red Bull-liðsins í Formúlu 1, er mjög harðorður þegar hann talar um áhrif Pirelli-dekkjanna á kappaksturinn í ár. Liðið hans hefur undanfarið þurft að sætta sig við verri úrslit en beinn hraði bílanna ætti að skila.

"Allir vita hvað er að gerast hérna," sagði Mateschitz. "Þetta snýst ekki lengur um kappaksturinn heldur er þetta keppni um að vernda dekkin." Hann er sagður hafa upplýst Bernie Ecclestone um áhyggjur sínar á fundi á sunnudagskvöld. Hann segir Pirelli einfaldlega hafa gengið of langt í ár.

"Raunverulegur kappakstur lítur öðruvísi út. Í þessum kringumstæðum getum við hvorki náð því besta úr bílunum né ökumönnunum. Það er ekki raunverulega keppt um ráspól í tímatökum því allir reyna að vernda dekkin."

Pirelli hefur unnið eftir beiðni stjórnenda í Formúlu 1 og framleitt dekk sem framkalla fleiri viðgerðarhlé en Mateschitz segir dekkjaframleiðandan hafa gert skissu. "Vissulega var markmiðið að gera leikinn meira spennandi og framkalla fleiri stopp en þetta er einfaldlega of mikið."

Helmut Marko, mótorsportstjóri Red Bull, hefur einnig gagnrýnt dekkin og segir þau jafnvel geta valdið alvarlegum slysum. "Við verðum að breyta uppsetningu bílanna fyrir dekkin. Ég er hugsi yfir því hvenær dekkjabilanir muni framkalla alvarleg slys," sagði Marko. "Við erum í hættu á að það gerist og við getum aðeins látið Pirelli vita af áhyggjum okkar."

Pirelli hefur sagt að viðgerðahléafjöldi í Barcelona um síðustu helgi hafi verið of tíður og ætlar að kanna hvort hægt sé að breyta gúmmíblöndunni fyrir breska kappaksturinn.