Ætlar að halda með með Bayern í kvöld

Nico Rosberg, ökumaður Mercedes-liðsins í Formúlu 1, ætlar að halda með Bayern Munchen í úrslitaleik Meistaradeildarinnar í kvöld. Bayern mætir Borussia Dortmund á Wembley í leik um eftirsóttasta titil Evrópu.

Rosberg er Þjóðverji þó faðir hans sé finnskur og er gallharður stuðningsmaður Bæjara. Hann setti í dag mynd af sér á Facebook sem tekin var eftir tímatökuna í Mónakó í dag. Þá var Nico búinn að skella viðeigandi trefli á herðarnar og sýndi að hann á rauða treyju.

"Og koma svo Bayern," skrifaði Rosberg á vegginn hjá sér. Á morgun mun Rosberg ræsa fremstur í Mónakókappakstrinum og freista þess að vinna eftirsóttasta hnossið í evrópskum kappakstri. Það skyldi þó aldrei vera að Þjóðverjar ættu meistara í London og Mónakó?