Vettel vann ítalska kappaksturinn og er að stinga af

Þýski heimsmeistarinn Sebastian Vettel vann öruggan sigur í Monza-kappaksturinn í formúlu eitt í dag og jók forskot sitt í keppni ökumanna upp í 53 stig. Vettel vann þarna annan kappaksturinn í röð og þann sjötta á tímabilinu.

Sebastian Vettel var á ráspólnum og það átti enginn möguleika í þrefaldan heimsmeistara í ham. Red Bull–Renault liðið bætti líka við forskot sitt í keppni liða með því að eiga tvo menn á palli.

Fernando Alonso á Ferrari varð í örðu sæti en liðsfélagi Sebastian Vettel hjá Red Bull–Renault, Mark Webber, varð síðan í þriðji. Alonso átti ágætan dag og hækkaði sig um þrjú sæti frá því í ræsingunni.

Sebastian Vettel vann þarna sinn 32. kappakstur á ferlinum en jafnaði þar með Fernando Alonso en Þjóðverjinn þurfti miklu færri keppnir til að ná þessu heldur en Spánverjinn.  

Nico Hülkenberg á Sauber vakti mikla athygli með því að ræsa þriðji á Monza í dag en hann endaði síðan í fimmta sætinu á eftir Felipe Massa á Ferrari.

Sebastian Vettel er nú kominn með 222 stig í keppni ökumanna eða 53 stigum meira en Fernando Alonso sem er með 169 stig. Það eru bara sjö mót og 175 stig eftir í pottinum.



Topp tíu í ítalska kappakstrinum 2013:

1. Sebastian Vettel, Red Bull-Renault

2. Fernando Alonso, Ferrari

3. Mark Webber, Red Bull-Renault

4. Felipe Massa, Ferrari

5. Nico Hülkenberg, Sauber-Ferrari

6. Nico Rosberg, Mercedes

7. Daniel Ricciardo, Toro Rosso-Ferrari

8. Romain Grosjean, Lotus-Renault

9. Lewis Hamilton, Mercedes

10. Jenson Button, McLaren-Mercedes

Staðan í keppni ökumanna:

1. Sebastian Vettel 222 stig

2, Fernando Alonso 169

3. Lewis Hamilton 141

4. Kimi Räikkönen 134

5. Mark Webber 130

6. Nico Rosberg 104

7. Felipe Massa 79

8. Romain Grosjean 57

9. Jenson Button 48

10. Paul di Resta  36