Starfsfólk ÍSÍ fór að hlæja

Jón Axel Jónsson lauk á dögunum hæstu þjálfaragráðu í tennis. Hann segir að bæta þurfi aðstöðu til muna á Íslandi til að geta fjölgað afreksfólki í íþróttinni.

„Við vorum að þjálfa efnilegustu krakka í heimi. Þetta var virkilega skemmtilegt og ég lærði ekkert smá mikið af þessu,“ segir Jón Axel Jónsson. Tenniskappinn af Álftanesi er útskrifaður með þriðju og um leið hæstu þjálfaragráðu Alþjóðatennissambandsins, ITF, en hann dvaldi í Valencia á Spáni í sex vikur í sumar.

Jón Axel fékk styrk frá Alþjóðaólympíusambandinu til þess að sækja námskeiðið en aðeins átta til tólf manns fá styrkinn á hverju ári. Hann sótti um styrkinn í gegnum ITF, fékk staðfestingu á að styrkurinn hefði fengist og hélt í kjölfarið í höfuðstöðvar Íþrótta- og Ólympíusambands Íslands.

„Þau hlógu að mér fyrst,“ segir Jón Axel en starfsfólk ÍSÍ var ekki að kaupa að hann hefði fengið styrkinn. Afar sjaldgæft er að Íslendingar fái viðkomandi styrk og átti það greinilega ekki von á að þjálfari úr tennisheiminum hefði fengið hann.

Hentu í mig 15-20 bókum

Þjálfarabúðirnar voru tvískiptar. Annars vegar voru þjálfaraefnin úti á velli til þrjú á daginn að þjálfa fyrrnefnda tennisiðkendur. Ein frægasta tennisakademía í heimi er í Valencia þar sem bæði margt af besta og efnilegasta tennisfólki heims er við æfingar. Síðdegis tók við bóklegi þátturinn.

„Þeir hentu í mig 15-20 bókum,“ segir Jón Axel sem sat við lestur langt fram á kvöld. Í hverri viku var ákveðið þema og í lok hennar fór fram próf. Standast þurfti öll prófin til þess að öðlast réttindin. Jón Axel og landsliðsþjálfari Eista voru þeir einu sem tóku hæstu gráðuna í sumar en auk þess var landsliðsþjálfari Paragvæ að taka næsthæstu gráðuna. Jón Axel hefur áður menntað sig sem þjálfari í Bandaríkjunum þar sem hann var í háskóla.

Jón Axel segir að vikan þar sem líffræði var tekin fyrir hafi verið langerfiðust. Þar var skoðað hvernig líkamar iðkenda væru misjafnir miðað við kyn og aldur.

„Það var langerfiðasta prófið og ég hef sjaldan verið jafnstressaður,“ segir Jón Axel, sem lauk öllum prófunum með sóma. Hann þurfi reyndar að bíða í nokkrar vikur eftir heimkomuna en niðurstöðurnar skiluðu sér í síðustu viku.

Í æfingabúðunum hitti Jón Axel meðal annars fyrir Spánverjann David Ferrer og hina ítölsku Söru Errani. Jón fylgdist með þeim á vellinum og kynntist þjálfara Ferrers. Hann ber þeim vel söguna.

Ferrer út á akri að hlaupa

„Hann er hrokalaus, grínaðist í öllum og gaf af sér til krakkanna,“ segir Jón Axel. Það er nánast einsdæmi að hans mati enda haldi flestir af þeim bestu sig út af fyrir sig. Eftir æfingar einn daginn voru Jón og krakkarnir á leiðinni heim í rútu enda hitinn nærri fjörutíu gráðum. „Þá fór hann að hlaupa úti á ökrunum. Ég hef aldrei séð svona hörku áður.“

Jón Axel er einn af landsliðsþjálfurum Íslands og afar virkur í öllu tennisstarfi, sem fer að stærstum hluta ársins fram í Tennishöllinni í Kópavogi. Þar eru þrír vellir en Jón Axel segir fleiri velli þurfa til að tennis geti vaxið og krakkarnir geti bætt sig. Markmiðið sé að koma iðkanda á alþjóðastyrkleikalista. Margt þurfi að koma til þess að það takist.

„Það er stútfullt í Tennishöllinni allan daginn. Við mætum á æfingar klukkan 6.30 til þess að fá tíma fyrir krakkana,“ segir Jón Axel. Hann segir líka tíma til kominn að meiri skilningur sé sýndur hjá skólayfirvöldum gagnvart efnilegum íþróttaiðkendum.

„Það eru engir skólar á Íslandi sem vinna almennilega með íþróttum,“ segir Jón Axel. Hann bendir á að ytra geti iðkendur verið í skóla þar sem bæði sé lögð áhersla á menntun og krökkum gefinn kostur á að æfa íþrótt sína af kappi.