Breyttar aðstæður í Formúlu 1

Mestu reglubreytingar innan Formúlu 1 í aldarfjórðung hafa tekið gildi. Þær munu bylta ýmsu varðandi uppbyggingu Formúlu 1 bíla. Helst ber að nefna að vélin er ekki lengur 2,4 lítra V-8 vél heldur 1,6 lítra V-6 með túrbínu. Auk þess á mun meiri rafvæðing sér stað með auknum áherslum á að minnka eldsneytisnotkun og þróa í leiðinni tækni sem seinna gæti komið sér vel á einkabílum almennings.

Töluverður munur er á hljóðum vélanna tveggja. Lítið var um akstur á fyrsta degi æfinga í gær og því á eftir að koma í ljós hvort áhorfendur eigi eftir að sakna V-8 drunanna eða læra að elska V-6 vælið.

Ein mest umtalaða breytingin er fólgin í nýjum reglum um trjónu bílanna en staða hennar þarf að vera töluvert lægri en áður. Eins þarf framvængurinn að vera töluvert minni.  Þá hafa flest liðin gripið til þess að hanna trjónu sem lítur út eins og mauraæta. Þetta hefur leitt til þess að bílarnir þykja helst til ófagrir. Nú þegar flest liðin hafa frumsýnt bíla sína eru lið Ferrari og Mercedes þau einu sem ekki skarta mauraætu útliti á framtrjónu sinna keppnisbíla. Útlitshönnun Mercedes bílsins þykir vel heppnuð en framendi Ferrari bílsins líkist helst ryksugu.

Enn á eftir að koma í ljós hvaða liði hefur tekist best upp með nýju hönnunina. Telja verður fyrirfram að liðin sem hafa verið í toppbaráttunni undanfarin ár séu líkleg til að vera þar áfram. Þar ber helst að nefna lið Red Bull, sem er ríkjandi heimsmeistari bílasmiða, Mercedes og Ferrari.  Gaman verður að sjá hvort eitthvert þeirra liða sem barðist fyrir miðju undir reglum síðustu ára, nái að stíga upp og blanda sér í hóp þeirra bestu.

Það er ekkert leyndarmál að reglubreytingunum var meðal annars ætlað að minnka forystu Red Bull á keppinautana. Liðið hefur haft gríðarlega yfirburði undanfarin ár. Vonandi ná einhver lið að veita þeim harða samkeppni svo næsta tímabil verði spennandi.

Fyrsta keppnin fer fram í Ástralíu þann 16. mars.