Nýtt lið í Formúlu 1 á næsta ári? | Tveir áhugasamir

Opnað var fyrir umsóknir fyrir ný lið í Formúlu 1 fyrir skemmstu. Tveir aðilar sem sóttu um þykja koma sterklega til greina.  Annars vegar Gene Haas og hins vegar rúmenskur umsækjandi sem nýtur stuðnings stjórnvalda þar í landi

Gene Haas er stofnandi og meðeigandi í Nascar-liðinu Steward-Haas Racing. Haas þykir líklegastur til að fá leyfi en hann mætir þó harðri samkeppni frá Rúmeníu.

Hugsanlega munu báðir aðilar fá leyfi til að keppa á næsta ári. Reglur gera ráð fyrir að hámarksfjöldi liða sé þrettán en í ár eru þau ellefu. Það er Alþjóða akstursíþróttasambandið, FIA, sem tekur endanlega ákvörðun um umsóknirnar.

Haas segist vonast eftir svari sem fyrst. Hann bætir við að FIA muni ekki ákveða neitt nema að vel ígrunduðu máli. Það gæti tekið FIA langan tíma að ákveða sig. Hugsanlega verður því nýtt lið mætt til leiks á næsta tímabili en pláss er innan regluverksins fyrir tvö ný lið.