Robben: Markið hjá Evra vakti okkur

Hollendingurinn Arjen Robben rak síðasta naglann í kistu Man. Utd í kvöld og var að vonum kátur eftir leik.

"Þeir skora fyrsta markið og þá varð þetta snúið. Á endanum var því frábært að vinna 3-1," sagði Robben.

"Það var mjög mikilvægt að ná að jafna strax eins og við gerðum. Markið þeirra vakti okkur því fyrstu tíu mínúturnar í síðari hálfleik hjá okkur voru hrikalega lélegar. Það má ekki gerast í þessari keppni.

"Við vöknuðum og skoruðum þrjú mörk. Við vildum sækja en urðum alltaf að passa okkur á skyndisóknum þeirra."