Rúnar: Þeir báru ekkert alltof mikla virðingu fyrir okkur

„Þessi leikur leggst mjög vel í okkur. Ég er mjög spenntur fyrir að spila fyrir framan íslenska áhorfendur á ný,“ sagði Rúnar Alex Rúnarsson, aðalmarkvörður U-21 árs landsliðs Íslands, í samtali við Vísi fyrir æfingu liðsins í Egilshöll í gær.

Hann segir að samherjar hans í liðinu og þjálfarar hafi verið sáttir með fyrri leikinn gegn Danmörku á föstudaginn var, þar sem liðin skildu jöfn, 0-0.

„Ég held að við getum verið mjög sáttir með leikinn. Það hefði verið gott að ná að pota inn einu marki, en miðað við hvernig leikurinn spilaðist er gott að hafa haldið hreinu.

„Það gefur okkur sjálfstraust að hafa haldið markinu hreinu í 90 mínútur á móti þessu sterka liði. Það var líka gott að sýna þeim að við erum ekki eins léttir eins og þeir héldu,“ sagði Rúnar sem sagði að það hefði vottað fyrir hroka hjá dönsku leikmönnunum í aðdraganda fyrri leiksins.

„Já, já, það var alveg búist við því að við værum litla liðið og þeir myndu vanmeta okkur aðeins. Það kom ekkert á óvart,“ sagði markvörðurinn, en fann hann fyrir vanmati hjá Dönum?

„Já, maður gerði það. Maður tók alveg eftir því að þeir báru ekkert alltof mikla virðingu fyrir okkur.“

Rúnar, sem leikur undir stjórn Ólafs Kristjánssonar hjá Nordsjælland, vonast eftir fullum velli og miklum stuðningi í dag.

„Við vonumst eftir því að fá eins mikinn stuðning og hægt er. Tímasetningin er ekki sú besta, en vonandi mæta sem flestir. Það er svo mikilvægt að fá stuðning frá áhorfendum,“ sagði Rúnar að lokum.

Leikur Íslands og Danmerkur hefst klukkan 16:15 og verður í beinni textalýsingu á Vísi og beinni útsendingu á Stöð 2 Sport. Það verða þeir Ríkharð Óskar Guðnason og Hjörvar Hafliðason sem lýsa því sem fyrir augu ber á Stöð 2 Sport.