Gylfi Þór skoraði 23. markið sem Cillessen fær á sig úr víti

Gylfi Þór Sigurðsson skoraði þriðja markið sitt í undankeppni EM 2016 þegar hann kom Íslandi í 1-0 með marki úr vítaspyrnu gegn Hollandi á Laugardalsvellinum í kvöld.

Jasper Cillessen, markvörður Hollands, kom engum vörnum við frekar en í hin 22 skiptin sem hann hefur fengið á sig vítaspyrnu, en þær eru ekki hans sterkasta hlið.

Flestir muna eftir því á HM þegar Louis van Gaal tók Cillessen út af fyrir vítaspyrnukeppni gegn Kosta Ríka í átta liða úrslitum HM í sumar.

Hana unnu Hollendingar en þeir töpuðu svo þegar Cillessen stóð í markinu gegn Argentínu í undanúrslitum.

Michiel Jongsma, blaðamaður og tölfræðingur frá Hollandi, greinir frá þessum erfiðleikum Cillessen með vítaspyrnurnar á Twitter-síðu sinni í kvöld.

And 1-0 to Iceland. Penalty number 23 Cillessen has faced that goes in, still no stops for the Ajax man. (via @bartf)

— Michiel Jongsma (@JongsmaJongsma) October 13, 2014