UFC 181: Barist um titilinn í þyngdarflokki Gunnars í nótt

UFC 181 fer fram í nótt í Las Vegas í Bandaríkjunum þar sem tveir titilbardagar fara fram. Anthony Pettis mun verja léttvigtarbelti sitt og Johny Hendricks ver veltivigtarbelti sitt gegn Robbie Lawler. Bein útsending hefst kl 3 í nótt á Stöð 2 Sport.

Johny Hendricks og Robbie Lawler mættust um veltivigtartitilinn í mars á þessu ári. Bardaginn var hnífjafn og að mati MMA Frétta þriðji besti titilbardagi sögunnar. Áður en haldið var í fimmtu og síðustu lotuna hafði hvor bardagamaður sigrað tvær lotur og allt í járnum fyrir síðustu lotuna. Þegar skammt var eftir af lotunni náði Hendricks fellu sem tryggði honum titilinn og hann varð þar með veltivigtarmeistari UFC.

Síðar kom í ljós að Hendricks reif tvíhöfða í fyrstu lotunni og hefur hann verið frá keppni síðan. Á sama tíma hefur Robbie Lawler sigrað tvo sterka andstæðinga og þar með tryggt sér annan titilbardaga. Þetta verður því fyrsta titilvörn Hendricks og það gegn sama andstæðingnum.

Veltivigtin er einn mest spennandi þyngdarflokkur UFC í dag. Auk ofangreindra kappa eru í flokknum afar sterkir bardagamenn á borð við Rory MacDonald, Hector Lombard, Matt Brown, Tyron Woodley og auðvitað okkar maður, Gunnar Nelson. Hvernig sem bardaginn fer í nótt er ljóst að meistarinn þarf að hafa mikið fyrir því til að halda beltinu.