Bannað að breyta útliti hjálmanna

FIA, alþjóða akstursíþróttasambandið hefur ákveðið að breyta reglum um útlit hjálma fyrir komandi tímabil. Nú má útlitið ekki breytast yfir tímabilið.

Markmið breytinganna er að auðvelda áhorfendum að þekkja ökumennina í sundur á brautinni. Ákvörðunin var tekin á fundi skiðulagsnefndar Formúlu 1 í gær, hún er háð því að þing FIA samþykki hana fyrir tímabilið.

Undanfarin ár hafa nokkrir ökumenn verið duglegir við að breyta útliti hjálma sinna á milli keppna.

Sebastian Vettel er meðal þeirra sem einna þekktastir eru fyrir að breyta oft um útlit. Hann átti það til að skipta jafnvel á milli tímatöku og keppni. Hann hafði þó þegar gefið það út að hann myndi halda sig við sama útlitið núna fyrst hann er kominn til Ferrari.

Einstakir hjálmar voru orðnir hluti af Mónakó kappakstrinum. Merkisviðburðum á ferli ökumanna var oft flaggað á hjálmi þeirra.

Fernando Alonso setti nöfn liðsmanna Ferrari liðsins til dæmis á hjálminn sem hann notaði í síðustu keppni sinni með ítalska liðinu. Kimi Raikkonen setti nafn fyrrum heimsmeistarans James Hunt á hjálminn sinn fyrir Mónakókappaksturinn 2012.