Alonso: Held við náum í stig í Mónakó

McLaren mun ná í sín fyrstu stig í ár í keppninni í Mónakó um helgina ef marka má orð annars ökumanna liðsins, Fernando Alonso.

Alonso neyddist til að hætta keppni í síðustu keppni þegar bremsurnar á bíl Spánverjans ofhitnuðu. Alonso hefði endað níundi ef marka má útreikninga McLaren liðsins.

Jenson Button, liðsfélagi Alonso lýsti MP4-30, McLaren bíl sínum sem þeim ógnvænlegasta sem hann hefur ekið.

„Ég held að við náum í stig í Mónakó,“ sagði Alonso sjálfsöruggur í viðtali við Sky Sports.

Alonso telur að McLaren fari að berjast um eitt eða tvö stig í komandi keppnum. Liðið mun svo fara að ná stöðugum framförum. Austurríski kappaksturinn verður vendipunktur því þá mun liðið taka stórt framfarastökk samkvæmt Alonso.

„Í næstu tveimur til þremur keppnum munum við vera á mörkum þess að ná tíunda sæti. Markmiðið er svo að komast í sjöunda til áttunda sæti frá og með austurríska kappakstrinum. Það er markmiðið,“ sagði Alonso.

„Við þurfum að fara að nálgast verðlaunasæti. Ég er mjög bjartsýnn,“ bætti Alonso við að lokum.