Hrútar fá frábæra dóma í erlendum miðlum

„Hver hefði trúað því að kvikmynd sem fjallar um kindur gæti fengið þig til að gráta?“ Á þessum orðum hefst fimm stjörnu dómur Ninu Hudson hjá The Upcoming um Hrúta, kvikmynd Gríms Hákonarsonar, sem frumsýnd var í Cannes á föstudaginn. Það er rétt að taka fram að viljirðu horfa á myndina og vita sem minnst um söguþráðinn er rétt að láta yfirferð Vísis á dómum annarra miðla nægja.

Myndin fjallar um bræðurna Gumma og Kidda, leikna af Theódóri Júlíussyni og Sigurði Sigurjónssyni, sem hafa ekki talað saman í fjörutíu ár þrátt fyrir að búa hlið við hlið. Þegar riðuveiki kemur upp í dalnum neyðast þeir til að taka þráðinn upp til að bjarga því sem stendur þeim næst.

Í dómi The Upcoming segir enn fremur að frammistaða Sigurðar og Theódórs í hlutverkum sínum tryggi strax að áhorfandinn tengist þeim og tengingunni vaxi ásmegin eftir því sem líður á myndina. Söguþráðurinn sé góður og frábær tónlist Atla Örvarssonar töfrar fram miklar tilfinningar sem sitja í manni lengi eftir að síðasti rammi myndarinnar hverfur af skjánum.

Framan af myndinni er frammistaða Sigurðar Sigurjónssonar mun betri en Theódórs segir í grein Hollywood Reporter. Þegar líður á myndina tekur persóna Theódórs miklum breytingum og á endanum fær hann einnig mikið lof fyrir sína frammistöðu.

Kvikmyndinni hefur verið hampað fyrir að færa sig án áreynslu milli mismunandi stefna. Eina stundina er hún kómísk, þá næstu gnæfir melankólía yfir öllu þó stutt sé í léttleikann. Þetta gerir hún án þess að tapa stefnu segir í dómi Flix.gr. „Og eins og allt þetta sé ekki nóg, þá endar myndin á einni fallegustu og mest hreyfandi senu sem sést hefur í kvikmyndum í langan tíma,“ segir í niðurlagi dómsins.

Kvikmyndataka Sturlu Brandth Grovlen er tekin fyrir í dómi The Seventh Row. Þar segir að íslenska landslagið fái ávallt að njóta sín þó það sé aldrei gert að aðalatriði. Á einhvern undarlegan hátt takist honum, og Grím leikstjóra, á köflum að skjóta myndina, sem fjallar um kindur, líkt og um spennumynd væri að ræða. 

Í dómi Variety er komið inn á leikmyndina og búninga. Bjarni Sigurbjörnsson sá um leikmyndina og segir í dómnum að þó hún láti hluti oft líta út fyrir að vera óbreytta frá 1940 þá nái smáatriðin að upplýsa mjög um hvaða persónu söguhetjurnar hafi að geyma. Margrét Einarsdóttir hafði yfirumsjón með búningamálum og er nefnt að lúnar lopapeysurnar og tötralegar buxurnar segi mikið til um menn sem ekki búa með konum.

Cannes hátíðinni lýkur um helgina og að henni lokinni verður Hrútar tekin til sýningar hér á landi. Hún verður forsýnd í Bárðardal þar sem hún var tekin upp áður en hún ratar í önnur kvikmyndahús á landinu.