Hægt var að komast framhjá biðröðinni | Mac-notendur reiðir

Uppselt er á leik Íslands og Tékklands í undankeppni EM 2016 sem fram fer 12. júní. Miðasalan hófst klukkan 12.00 og voru allir miðar farnir rétt fyrir eitt.

Þeir sem reyndu að kaupa sér miða þurftu að fara í biðröð í nýju miðasölukerfi miði.is sem sett var upp til að dreifa álaginu og heppnaðist það að mörgu leyti ágætlega.

Fram kemur þó á fótbolti.net að hægt var að komast framhjá biðröðinni og fá sér miða án þess að bíða.

Sumir sem keyptu sér miða deildu miðakaupunum á Facebook eða Twitter. Þeir sem voru nógu heppnir að smella á þann hlekk fengu möguleika á að fara með viðkomandi á leikinn.

Þannig var hægt að kaupa sér miða án þess að bíða í biðröðinni löngu. Starfsmenn fótbolti.net reyndu þetta sjálfir og staðfesta að þessi leið virkaði.

Mac-notendur reiðir

Þetta var ekki eini gallinn við miðasöluna. Hörður Ágústsson, eigandi verslunarinnar Macland, sem selur Mac-vörur gat ekki keypt sér miða í gegnum Safari-vafrann á Mac-tölvunni sinni. Frá þessu greindi hann á Facebook-síðu snini.

„Við munum skoða þetta með Safari-vafrann,“ segir Ragnar Árnason, framkvæmdastjóri miði.is, við Vísi, en hann viðurkennir að hafa heyrt nokkrum til viðbótar sem lentu í sama vandamáli.

„Þetta er ekki algilt samt. Sumir eiga bara eftir að uppfæra flash á vafranum hjá sér. Þetta er samt klárlega eitthvað sem við munum skoða,“ segir Ragnar sem telur að ekki margir hafi misst af miða vegna þessa vandamáls.

„Þú getur rétt ímyndað þér miðað við hlutdeilt Mac á Íslandi að svo er ekki. Þá væri um helmingurinn af Íslandi sem hefði ekki getað keypt sér miða. Það voru fjölmargir sem fóru inn á Mac-tölvu og gátu keypt sér miða,“ segir Ragnar Árnason.