Landhelgisgæslan býður landsmönnum í heimsókn

Landhelgisgæslan hyggst bjóða landsmönnum í heimsókn í tilefni af sextíu ára flugsögu Landhelgisgæslu Íslands og að fjörutíu ár eru liðin frá útfærslu lögsögunnar í 200 sjómílur.

Opið hús verður í flugskýli Landhelgisgæslunnar við Nauthólsvík á Reykjavíkurflugvelli, næstkomandi sunnudag milli klukkan 12 og 16.

Í tilkynningu frá Landhelgisgæslunni segir að starfsmenn muni taka vel á móti gestum og kynna þeim fjölbreytta starfsemi Landhelgisgæslunnar sem fram fer um allt land.

„Gefst fólki kostur á að skoða þyrlur og flugvél Landhelgisgæslunnar sem og margvíslegan annan búnað sem notaður er í starfseminni svo sem báta, köfunarbúnað, sprengjueyðingarbúnað, sjókort, ýmis mælitæki, myndir úr allri starfseminni og margt fleira áhugavert.

Bílastæði við flugskýli Landhelgisgæslunnar verða eingöngu fyrir gangandi umferð og hreyfihamlaða en gestum er góðfúslega bent á að leggja bílum á bílastæði við Háskólann í Reykjavík og í Nauthólsvík.

Landhelgisgæslan vonast til að sem flestir kíki í heimsókn til að kynna sér starfsemina, hitta starfsmenn, skoða tækjabúnaðinn og fagna þessum tímamótum með okkur.“