Verður brjálæðislega erfiður leikur

„Það er Liverpool-veður hérna. Þoka og smá suddi en samt hlýtt,“ segir yfirvegaður landsliðsþjálfari, Heimir Hallgrímsson, eftir æfingu landsliðsins í Varsjá í gær.

Strákarnir hans Heimis og Lars Lagerbäck eiga erfitt verkefni fyrir höndum í kvöld. Þá mæta þeir geysisterku liði Pólverja fyrir fulluhúsi áhorfenda sem ætla að sjá sína menn valta yfir íslenska liðið.

Ekki hægt að fá betri leik

„Við vitum að þetta verður brjálæðislega erfiður leikur. Góðir andstæðingar með marga klassaleikmenn. Það er ekki hægt að fá betri æfingaleik en þennan. Fullur völlur og stemning hjá þjóðinni. Þeir eru að koma í leikinn til þess að sýna þjóðinni hversu góðir þeir eru og vilja örugglega valta yfir okkur,“ segir Heimir en pólska liðið er líka á leið á EM og skoraði allra þjóða mest í undankeppninni.

Sjá einnig: Lars léttur í Varsjá: Aron Einar er stundum til vandræða

Landsliðsþjálfarinn segir að fólk eigi ekki von á neinum breytingum í leik íslenska liðsins í kvöld. Það verður haldið áfram að vinna með þá hluti sem hafa virkað fyrir liðið.

„Við horfum fyrst og fremst í að liðið haldi áfram skipulagi og að það sé stöðugt í sínum leik. Við viljum að sjálfsögðu byggja ofan á þennan stöðugleika sem við höfum búið til. Í leiðinni viljum við fá að sjá ný andlit reyna sig með okkur,“ segir Heimir en þjálfararnir hafa verið frekar íhaldssamir síðan þeir tóku við liðinu.

„Þetta er tíminn til þess að gefa nýjum mönnum tækifæri. Það er rétt að við höfum verið íhaldssamir enda ekkert tilefni til að breyta miklu. Það hefur meira og minna allt gengið upp hjá okkur. Svo hefur verið virkilega góð liðsheild og góður andi í hópnum. Það er því kærkomið að fá núna tækifæri til þess að gefa nýjum mönnum tækifæri og enn betra að það sé gegn svona sterkum andstæðingum,“ segir Heimir en hann býst við að við fáum að sjá tvö ný andlit í byrjunarliðinu.

Sjá einnig: Ungir fá tækifæri í landsliðinu

Íslenska liðið hefur ekki unnið síðustu þrjá leiki sína en það breytti engu því strákarnir fengu stigið sem fleytti þeim á EM.

„Þetta er nýtt fyrir okkur öllum að halda einbeitingu og aga í leikjum þegar við höfum í raun náð markmiðum okkar. Við getum ekki leitað í reynslubanka þar. Við erum að feta nýjar slóðir og okkar hlutverk er að minna leikmenn á að halda aga og einbeitingu.“

Baráttan um sætin dýrmætu í EM-hópnum hefst í kvöld og þeir sem fá tækifæri núna og næsta þriðjudag gegn Slóvökum verða að vera á tánum því tækifærin til að sýna sig og sanna verða af skornum skammti.

Fá tækifæri til að sanna sig

„Það eru bara þessir leikir og svo tveir leikir í mars. Eftir það verður hópurinn valinn. Skandinavíustrákarnir fá reyndar aukaleiki í janúar. Þar sem tækifærin eru fá viljum við gefa strákunum, sem hafa verið á barmi þess að komast í hópinn, tækifæri til þess að sanna sig.“

Strákarnir fá að glíma við heitasta framherja heimsins í kvöld, Robert Lewandowski. „Við höfum ekki verið að gera breytingar og sérstakar ráðstafanir gegn stjörnunum í þessum vináttuleikjum. Gerðum það ekki gegn Ribery, Zlatan eða Gareth Bale. Við verðum meðvitaðir um hversu hættulegur Lewandowski er og reynum að vinna það saman að stöðva hann,“ segir Eyjamaðurinn.

Breiddin er fín

Íslenska liðinu hefur ekki gengið neitt sérstaklega vel í vináttulandsleikjum á síðustu árum. Leikirnir núna hafa þó miklu meiri merkingu í ljósi þess hvað verið er að keppa um: Farseðil til Frakklands.

„Það er sem betur fer meiri fókus í alvöru leikjunum hjá okkur. Svo höfum við verið ófeimnir við að prófa nýja leikmenn í vináttuleikjum og þetta er oft erfitt þegar það koma margir nýir sem hafa ekki verið áður,“ segir Heimir en er breiddin nógu mikil?

„Ég vil meina að breiddin sé fín. Við höfum samt nánast keyrt á sama liði í fjögur ár núna og þar þekkja allir hver annan inn og út. Það er svo ósanngjarnt að gefa einhverjum manni einn æfingaleik og ætla að dæma hann alveg út frá honum. Það tekur tíma fyrir menn að slípa sig inn í landsliðið.“

Verðum að vera raunsæir

Jafnvel þótt íslenska liðið hafi ekki unnið síðustu þrjá keppnisleiki þá heldur Heimir rónni.

„Við vorum svekktir yfir seinni hálfleiknum gegn Lettum. Við vorum ánægðir með Kasakstan-leikinn enda lagt upp með að fá stig og fá ekki á sig mark þar. Leikurinn í Tyrklandi var að okkar mati góður þó að hann hafi tapast. Við erum því ekkert svekktir yfir þessum þremur leikjum þótt ekki hafi hrúgast inn stig. Við viljum auðvitað alltaf vinna alla leiki en við gerum okkur grein fyrir því að við erum Ísland og verðum að vera raunsæir líka.“